Welkom
10 November 2011
Sjoe! Die 8ste Varingfees is verby en voel dit so onwerklik. Wat kan 'n mens meer sê as DANKIE DANKIE DANKIE. Daar was die jaar soveel mense betrokke wat bedank moet word dat as ek nou gaan begin, ek sekerlik die volgende uur nog name hier sal moet neersit - so om almal nie te veel te verveel nie sal ek net kortliks dit doen.My "mede-varingfees familie" - die komitee - sonder julle harde werk die hele jaar deur is hierdie fees maar net 'n mooi idee - mense besef nie dat ons al weer Desember begin inspring met al die reëlings nie en dat daar net nooit ophou beplan word nie - julle is net eenvoudig AWESOME.
Ons gemeente (NG KERK PROTEAHOOGTE) - julle het soos een man opgestaan en ons kom help en saam die storms - letterlik en figuurlik - afgeweer - dankie vir julle elkeen se bydrae - julle is baie spesiaal vir ons.
Ons ondersteuningsdienste - van die SAP tot by die Stad Kaapstad - julle is ook elke jaar daar en julle ondersteuning is ongekend. Die feesgangers - julle is al deel van ons familie. Dit is so lekker om elke jaar die bekende gesigte terug te sien en te weet dat julle ons fees ondersteun en in die proses ook die liefdadigheidsorganisasie wat baat vind by die fondse wat die fees genereer.
Ons borge, MTN, Coke Cola, Toyota Barloworld, Die gastehuise, Musiekwêreld, Krystal IT Solutions en vele meer (sien die volledige lys hieronder op die webblad) het soos altyd hulle steun, finansies en hulp agter die fees ingegooi - die jaar was ons ook bevoorreg om die pad saam met 'n paar nuwe borge aan te pak en was ons vennootskap met Bok Radio veral een waaraar daar nog lank gepraat sal word. Vir al die bestaande borge en die nuwe borge kan ons net die Liewe Vader dank dat Hy hierdie besighede en instansies oor ons pad gebring het en dat ons so 'n wonderlike fees met die borge se hulp kan aanbied.
Ons kunstenaars het soos altyd hulle harte kom uit sing en die feesgangers vermaak en kon hulle nie uitgepraat raak oor die gasvryheid wat hulle ontvang het nie, die absoluut fantastiese klank en die feit dat hier 'n sober fees is wat vir hulle spesiaal is aangesien die aanhangers daar is om hulle te kom hoor en geniet.
Baie dankie aan elkeen wat die 2011 fees kom bywoon het saam met ons. Ons dank ons Hemelse Vader dat ons die reën gespaar was en vir elkeen wat betrokke was, bygewoon het of selfs net vir ons sterkte toegewens het.
Varinggroete
Sunel Beeselaar
Varingfees 2011 Voorsitter
|
|
